رحيم دهري عيدان

 "جانت اكثر 29 يوم غنية بالإنجازات بحياتي" أقوى تحدي هو تحدي الذات وتحدي الظروف وتحدي الكسل الي موجود بداخل كل واحد مننا.  ماكو احد ميحب الراحة الراحة حلوة لكن من تطور نفسك وتتعلم شيء جديد النتيجة راح تكون احلى بهواي من الراحة.   اني رحيم دهري ،عمري 25 واشتغل مدرس لغة انكليزية. عندي شهادة بكالوريوس بالغة الإنكليزية واحب اختصاصي. لكن هوايتي الأولى هي التصميم والبرمجة َوكل الأعمال الي تتعلق بالحاسوب. قبل سنة من الان دخلت دورة حورية لتعلم الفوتوشوب وجانت دورة إبتدائية فادتني هواي بس انقطعت عن التصميم وره نهاية الدورة بمدة قليلة واخذتني مشاغل الحياة بعيد عن التصميم تابعت حساب مرتضى التميمي "صاحب المبادرة مال التحدي" وكلش عجبني محتواه.. اتذكر زميلي بالجامعة علي رضا هو الي نشر حسابه. بمجرد شفت كلمة تحدي قررت أشارك وقررت اسوي التحدي سبب حتى ارجع للتصميم واطور نفسي بيه.. خلال 29 يوم حققت نتائج مبهرة واني كلش معجب بهذا التقدم الي حققته. مصر انه استمر اتحدى نفسي حتى لو خلصن ال29 يوم. لانه انزرع بداخلي تحدي الذات من أجل هدف راسمه ببالي.  كتغيير شوية عن التصميم  دخلت دورة برمجة

 شعور كلش حلو لمن تسوي الشغلات الي جنت تنبهر لمن تشوفها!  جنت من اشوف اعلان مميز على السوشيال ميديا او بالشارع اكول ياريت لو اعرف اصمم هيج. مجنت ما متخذ خطوه وحده جدية علمود احاول اسوي هالشي العجبني.  جنت اشوف ابن عمي يطگلي صوره بتيشيرت ويطلعها لابس قاط. اكول ياريت لو اعرف اسوي مثله. سألته يعلمني كال هالشي صعب عليك.  الي اريد اگوله انه جان التصميم هدفي بدون ما اعرف لكن مجنت مخلي خطة واستراتيجات صحيحة علمود تحقق هذا الهدف.  التصميم الگرافيك هواي بي تفرعات وتفاصيل كل يوم جاي اتعلم شي جديد.. بما انه التصميم بحر وكلما تبحر بس أكثر تحبه اكثر وتريد تتعمق بي اكثر. اني احس نفسي هسه غرگان ببحر التصميم بالنص اني حاليا. طبعا هواااي اشياء جنت عبالي صعبة وبالاخير يلا اكدر اصممها بس طلعت كلش سهلة وسويتها  واتعلمت اشياء أصعب منها واجمل منها. جلي اتقدم بشكل سريع بس الوقت بهاي الفترة اقل من الفترة القبلها بسبب  عمل بناء بالبيت وكلش مشغول بيه بس مجاي أهمل التحدي مالتي لان بالبداية كان تحدي لنفسي قبل ليكون مسابقة وي غيري. اليوتيوب هو المساعد الأساسي اليه بمسيرتي بتعلم التصميم، بصراحة ما اتذكر اسماء أصحاب

مصمم على أن أكون مصمم. مثل ماتعرفون اني دا اعلم نفسي التصميم الجرافيكي. وبهاي الفترة مخلي اهتمام كلش جبير بهالموضوع بحيث حتى ماعندي فراغ أملي الاستمارة او انشر بالمدونه ودائما متأخر. اول ما بلشت بالتحدي خليت هدف ببالي وهن ان اكون مصمم بالمستقبل القريب هم مو البعيد واشوف نفسي دا اتقرب من هالهدف وحتى بدت بوادر نفسية نتضحلي. التصميم يعتمد ع الذوق الشخصي ويعتمد على حب المصمم لعمله لذلك مو اي واحد يكدر يصير مصمم. اذا انت ما جاي لهاي الشغلة بشغف وحب مراح تكدر تضبطها لان التصميم اله ارتباط كلش جبير بالجوانب النفسية. مزاجك راح ينطبع ع العمل الي جاي تشتغل وجربت هالشغلة كلش هواي. المهم، بهاي الفترة اني مثل ما كلت فوك مخلي اهتمام ووقت كلش جبير للتصميم او لتعلم التصميم. جاي استعين باليوتيوب ناس اعرفهم وناس ما اعرفهم اخلي ببالي هدف اليوم اتعلم مثلا مثلا النص ثلاثي الأبعاد. اروح اشوف اكثر من فيديو على هاي الشغلة وبنهاية اليوم اكون ضبط هذا النص. وهكذا اما بالنسبة للتمارين ف ما اكتفي بواحد اول تمرين يكون تقليد مع المدرب الثاني يكون وحدي واشوف نفسي ضبطت المهمه لو لا؟ بالنسبة العوائق اكيد اي واحد. تواجه