تحدي 29 يوم /اليوم الـ20

 شعور كلش حلو لمن تسوي الشغلات الي جنت تنبهر لمن تشوفها! 

جنت من اشوف اعلان مميز على السوشيال ميديا او بالشارع اكول ياريت لو اعرف اصمم هيج. مجنت ما متخذ خطوه وحده جدية علمود احاول اسوي هالشي العجبني. 

جنت اشوف ابن عمي يطگلي صوره بتيشيرت ويطلعها لابس قاط. اكول ياريت لو اعرف اسوي مثله. سألته يعلمني كال هالشي صعب عليك. 

الي اريد اگوله انه جان التصميم هدفي بدون ما اعرف لكن مجنت مخلي خطة واستراتيجات صحيحة علمود تحقق هذا الهدف. 

التصميم الگرافيك هواي بي تفرعات وتفاصيل

كل يوم جاي اتعلم شي جديد.. بما انه التصميم بحر وكلما تبحر بس أكثر تحبه اكثر وتريد تتعمق بي اكثر. اني احس نفسي هسه غرگان ببحر التصميم بالنص اني حاليا. طبعا هواااي اشياء جنت عبالي صعبة وبالاخير يلا اكدر اصممها بس طلعت كلش سهلة وسويتها  واتعلمت اشياء أصعب منها واجمل منها.

جلي اتقدم بشكل سريع بس الوقت بهاي الفترة اقل من الفترة القبلها بسبب  عمل بناء بالبيت وكلش مشغول بيه بس مجاي أهمل التحدي مالتي لان بالبداية كان تحدي لنفسي قبل ليكون مسابقة وي غيري.

اليوتيوب هو المساعد الأساسي اليه بمسيرتي بتعلم التصميم، بصراحة ما اتذكر اسماء أصحاب القنوات المتفضلين طبعا. لان اني جاي اركز ع مَهمة  معينة واروح. اتعلمها من أكثر من شخص على اليوتيوب.

اكو فيديوات قديمة خازنها بالحاسبة من دورتي الأولى بالتصميم للأستاذ سمير العيداني (الله يذكره بالخير ويمن عليه بالشفاء) . جاي استفاد منها بتذكر بعض الاوامر.

التايم رينج  الي جاي امشي بي حاليا زين جيد يعني بس أقل من قبل بس ان شاء الله بالجايات اكثرة بعد لان اريد استفاد اكثر استفادة ممكنة. أما بالنسبة للتطبيقات هن التليكوام واليوتيوب وبعض الفيديوات على الكمبيوتر مالتي.

ان شاء الله الهدف بدأ يلوح الافق. هسه الاحساس غير شكل. من اشوف تصميم حلو وين ما كان اكول اي هذا هيج. وهيج. َهيج يصير  بديت افهم حتى التصاميم المعقدة واحللها بسرعة. ماكو إنجازات كلش هواي هاي الفترة لأن مركز ع التمارين اكثر 

اتعلمت برنامج الستريتور كبداية فقط يعني مو مثل الفوتوشوب قوي بيه. 

ان شاء الله الهدف هو أن أكون مصمم.